مشال ارشد سی ایم انڈر گراؤنڈ نیوز
چئیرمین پاکستان تحریک انصاف (پی ٹی آئی) عمران خان کی بنی گالا کی رہائش گاہ کے قریب سے ایک شخص پولیس کے حوالے کردیا گیا۔
پی ٹی آئی کے رہنما شہبازگل نے اس شخص پر بنی گالا میں جاسوسی کا الزام لگایا ہے۔
دوسری جانب اسلام آباد پولیس کے مطابق حوالےکیا گیا شخص بطور خاکروب پانچ سال سے بنی گالا ہاؤس کا ملازم ہے، عمران خان،شہباز گل یا بنی گالا ہاؤس سے کسی نے بھی مشکوک شخص سے متعلق معلومات نہیں دیں۔
پولیس کا کہنا ہےکہ بنی گالا ہاؤس میں تعینات ملازمین کی فہرست ابھی تک فراہم نہیں کی گئی، قانون نافذ کرنے والے اداروں کے لیے بنی گالا ہاؤس میں کام کرنے والے ملازمین کی شناخت ایک چیلنج ہے۔
پولیس کے مطابق مشکوک شخص نے پولیس کو بیان میں کہا کہ شہباز گل اور عمران خان کے ملازمین نے دو روز سے حبس میں رکھا ہوا تھا، رہائش گاہ پر تعینات گلگت بلتستان پولیس کے اہلکاروں نے تشدد بھی کیا، موبائل اور شناختی کارڈ بھی شہباز گل نے واپس نہیں کیا۔
پولیس حکام کا کہنا ہےکہ عمران خان کےکسی نمائندے یا پی ٹی آئی رہنما نے واقعے سے متعلق پولیس کو کوئی اطلاع یا درخواست نہیں دی، عمران خان یا ان کے ملازمین درخواست نہیں دیتے تو پولیس کیسےکوئی کارروائی کر سکتی ہے، مشکوک شخص تشدد، موبائل اور پرس وغیرہ واپس لینے کی درخواست دے تو کارروائی کریں گے۔