دبئی (بیورورپورٹ)
تین خلیجی ممالک کو غیر ملکیوں یا تارکین وطن کی رہائش کے لیے دنیا کی 10 بہترین جگہوں میں شمار کیا گیا ہے۔ متحدہ عرب امارات کو چوتھے، بحرین کو آٹھویں جبکہ قطر کو دسویں نمبر پر رکھا گیا ہے۔ عرب نیوز نے ایچ ایس بی سی کی 14 ہویں سالانہ ایکسپیٹ ایکسپلورر سٹڈی کے حوالے سے بتایا ہے کہ سوئٹرزلینڈ تارکین وطن کے رہنے کیلئے بہترین ملک قراردیا گیا ہے۔ اس فہرست میں دنیا کے 48 ممالک یا جگہوں کو شامل کیا گیا ہے جس میں سعودی عرب کو غیر ملکیوں کی رہائش کے لیے 39 واں بہترین ملک قرار دیا گیا ہے۔
رپورٹ کے مطابق متحدہ عرب امارات میں رہائش کا معیار وہ واحد وجہ ہے جو تارکین وطن کے زیادہ عرصے تک رہنے کی بنیاد ہے۔ سروے میں لوگوں کی تنخواہوں، کیریئر میں آگے بڑھنے کی صلاحیت، ملازمت کی حفاظت اور بچت جیسے معاملات کو مدنظر رکھا گیا، تاہم اس کے ساتھ سروے میں لوگوں سے سماجی مسائل کے بارے میں بھی دریافت کیا گیا۔
