ہیڈ آف نیوز اسلام آباد منتظر مہدی
سپریم کورٹ نےجعلی اکاونٹس کیس کے ملزمان محمد عمیر, طحہ رضا اور حسین لوائی کی ضمانت کا معاملہ درخواست گزاروں کو ہائی کورٹ سے رجوع کرنے کو ہدایت کرتے ہوۓ نمٹا دیا ہے۔ معاملے کی سماعت جسٹس مشیر عالم کی سربراہی میں تین رکنی بینچ نےکی۔دوران سماعت ملزمان کے وکیل نے دلائل دئیے کہ ہمارے موکلان دو سال آٹھ ماہ سے جیل میں ہیں،مقدمہ کے شریک ملزمان کی ضمانتیں ہو چکی ہیں۔جسٹس مشیر عالم نے اس موقع پر ریمارکس دئیے کہ نیب ملزمان کوگرفتار کرنے کے ڈیڑھ سال بعد ریفرنس دائر کرتا ہے،جسٹس قاضی امین نے اس موقع پر کہا کہ نیب کے مقدمات میں وکلاء کی عدم حاضری پر چارج فریم نہیں ہوتا،چارج فریم کو وکیل کے آنے سے کیسے جوڑا جا سکتا ہے،چارج فریم کرنا ملزم اور عدالت کے درمیان معاملہ ہوتا ہے،جسٹس یحیی آفریدی نے اس موقع پر ریمارکس دئیے کہ ضمانت کی درخواستوں میں ہارڈ شپ پر ضمانت نہیں مانگی گئی،ملزمان نے میرٹ اور میڈیکل گراونڈز پر ضمانت مانگی ہے،اگر ہارڈ شپ پر ضمانت چاہیے تو دوبارہ ہائیکورٹ جائیں۔عدالت عظمیٰ نے ملزمان کے وکلاء کی رضا مندی سے نئے گراونڈز پر ضمانت کیلئے ہائیکورٹس سے رجوع کرنے کی ہدایت کرتے ہوۓ معاملہ نمٹا دیا ہے۔
