دبئی (بیورورپورٹ)
امارات نے ملک میں مقیم ڈاکٹروں کو گولڈن اقامے جاری کرنے کا فیصلہ کیا ہے۔
اماراتی نیوز ایجنسی (وام) کے مطابق نائب صدر وزیراعظم اور دبئی کے حکمران شیخ محمد بن راشد آل مکتوم نے فیصلے کی منظوری دے دی ہے۔حکومت نے ملک میں مقیم تمام ڈاکٹروں کو ہدایت کی ہے کہ وہ گولڈن اقامے کے لیے درخواست جمع کرائیں۔ ڈاکٹروں کو گولڈن اقامہ ملنے سے انہیں اور ان کے اہل خانہ کو ملک میں 10 سال تک قیام کی اجازت ہوگی نیز انہیں خصوصی مراعات بھی فراہم کی جائیں گی۔
ڈاکٹروں کو گولڈن اقامہ جاری کرنے کا فیصلہ کر کے دراصل کورونا کے انسداد کے لیے ان کی خدمات کا اعتراف کیا ہے۔ حکومت نے کہا ہے کہ ’ملک میں مقیم وہ ڈاکٹر جن کے پاس میڈیکل اتھارٹی کی طرف سے اجازت نامہ ہے وہ ستمبر تک گولڈن اقامے کے لیے آن لائن درخواست جمع کراسکتے ہیں۔
علاوہ ازیں امارات کی تمام ریاستوں میں موجود محکمہ اقامہ کے ذریعہ بھی گولڈن اقامے کی درخواستیں وصول کی جائیں گی۔
