نمائندہ خصوصی (لاہور)
لاہور : وزیراعلیٰ پنجاب عثمان بزدار کی معاون خصوصی برائے اطلاعات فردوس عاشق اعوان نے کہا ہے کہ نواز شریف گھر کارہا نہ گھاٹ کا، اس کا ٹھکانہ جیل ہے۔
برطانیہ میں سابق وزیراعظم نوازشریف کے ویزے میں توسیع سے متعلق درخواست مسترد کرنے کے حوالے سے میں فردوس عاشق اعوان نے سوشل میڈیا پر اپنے رد عمل کا اظہار کیا۔
سماجی رابطے کی ویب سائٹ ٹوئٹر پر جاری پیغام میں انہوں نے کہا کہ ملک و قوم کے ساتھ دغا کرنے والوں کا حشر نشر ایسا ہی ہوتا ہے، ظل سبحانی نےدیارغیر میں اربوں کھربوں کی جائیدادیں بنائیں۔
انہوں نے کہا کہ جس ملک میں جائیدادیں بنائیں اس ہی ملک نے ظل سبحانی کا کرپٹ بوجھ برداشت کرنے سے انکار کردیا وہ پاکستان کی ٹکٹ کٹوائیں جہاں جیل ان کی منتظر ہے۔
فردوس عاشق اعوان نے کہا کہ ظل سبحانی جیل کیلئے آپ کو ویزہ کی بھی ضرورت نہیں، ظل سبحانی، جعلی راج کماری کا ایک اورجھوٹ، پروپیگنڈا فاش ہوگیا۔
معاون خصوصی کا کہنا تھا کہ ثابت ہوگیا کہ ظل سبحانی مرض کا ڈھونگ رچا رہا تھا، مرض کا ڈھونگ کرکے پاکستانی عوام اور برطانیہ کو چکمہ دے رہا تھا، نواز شریف گھر کارہا نہ گھاٹ کا، اس کا ٹھکانہ جیل ہے۔
