ابوظبی(خصوصی رپورٹ)
ایمرجنسی کرائسز اینڈ ڈیزاسٹر مینجمنٹ اتھارٹی کے سرکاری ترجمان ڈاکٹر طاہر الامیری نے الحسن ایپ پر گرین پاس سسٹم کو اپ ڈیٹ کرنے کا اعلان کرتے ہوئے کہا ہے کہ اس کی میعاد 30 دن سے کم کرکے 14 دن کردی گئی ہے۔ سرکاری خبررساں ادارے وام کے مطابق انہوں نے کہا کہ اپ ڈیٹ کا اطلاق تمام کیٹیگریز پر بدھ 15 جون 2022 سے ہوگا۔
تعلیمی شعبے میں کام کرنے والوں اور طلباء کے لیے امتحان کی مدت کی وجہ سے اس فیصلے کا اطلاق پیر 20 جون 2022 کو ہوگا۔ انہوں نے کہا کہ الحسن ایپ استعمال کرنے والی تمام جگہوں پر تصدیقی عمل کو سخت کیا جائے گا۔ انہوں نے بتایا کہ حال ہی میں کرونا کیسز میں اضافہ ہوا ہے۔ ہسپتال میں داخل ہونے کی بڑھتی ہوئی شرح کے ساتھ ایک ہفتے میں کیسز کی تعداد میں 100 فیصد سے زیادہ اضافہ ہوا ہے۔
انہوں نے کہا کہ حال ہی میں معاشرے اور صحت عامہ کے لیے خطرات کا باعث بننے والے متعدد طریقوں کا مشاہدہ کیا گیا ہے جن کی روشنی میں احتیاطی تدابیر پرعمل کرنا ضروری ہوگیا ہے۔ ڈاکٹر طاہر الامیری نے کہا کہ تحقیقی مطالعات نے ثابت کیا ہے کہ ماسک پہننا صحت اور حفاظت کو برقرار رکھنے اور کرونا انفیکشن کے خطرے کو روکنے کے لیے سب سے اہم عوامل میں سے ایک ہے۔
یہ بیماری کے پھیلاؤ کو کم کرنے میں بھی موثر ثابت ہواہے۔ انہوں نے نوٹ کیا کہ معاشرے کے مختلف طبقات نے حال ہی میں بند علاقوں میں ماسک پہننے کی پابندی کرنے میں غفلت کا مظاہرہ کیا ہے۔ انہوں نے کہا کہ بند علاقوں میں ماسک پہننا لازمی ہے اور عوام کے مطابق خلاف ورزی کرنے والوں کو 3 ہزار درہم تک جرمانے کی سزا دی جائے گی۔
ڈاکٹر طاہر الامیری نے کہاکہ کرونا سے متاثرہ لوگوں کے ایک چھوٹے سے گروپ میں الگ تھلگ رہنے کی وابستگی کا فقدان دیکھا گیا جو معاشرے کی حفاظت کے لیے خطرہ ہے اور لوگوں میں وائرس کے پھیلاؤ کا سبب بنتا ہے۔ انہوں نے کہا کہ متحدہ عرب امارات میں ہمارے فرنٹ لائن محافظ دو سال سے مسلسل کام کر رہے ہیں اور ان کی کوششوں کی وجہ سے ملک نے وبائی مرض پر قابو پالیا ہے اور بحالی حاصل کر لی ہے۔
انہوں نےکہا کہ احتیاطی تدابیر پر عملدرآمد نہ کرنے کے باعث انفیکشن میں اضافہ ہوا ہے۔ انہوں نے عوام پر زور دیا کہ وہ بند جگہوں پر ماسک لگانے، ہجوم والی جگہوں سے گریز کرنے،سفر کے دوران محتاط رہنے اورباقاعدہ ٹیسٹ کروانے سمیت متعلقہ احتیاطی تدابیر پر عمل کریں۔
