مصباح لطیف(اے۔ای انڈرگرائونڈ نیوز)
بھارت اور جنوبی افریقا کے درمیان کیپ ٹاؤن میں جاری تیسرے ٹیسٹ میں اس وقت دلچسپ صورتحال پیدا ہوگئی جب ڈین ایلگر ڈی آر ایس پر ایل بی ڈبلیو قرار پانے سے بچ گئے مگر بھارتی ٹیم کو یہ بات نہ بھائی اور اس کے مختلف پلیئرز اسٹمپ مائیک پر براڈ کاسٹرز پر تنقید کرتے رہے۔
کیپ ٹاون ٹیسٹ کے تیسرے روز روی چندر ایشوین نے ڈین ایلگر کو ایل بی ڈبلیو کیا مگر ڈی آر ایس نے فیصلہ تبدیل کردیا اور ایلگر پویلین واپس لوٹنے سے بچ گئے ۔
یہ بات بھارتی ٹیم کو ہضم نہ ہوئی ، کے ایل راہول، روی چندرن ایشون اور ویرات کوہلی اسٹمپ مائیک پر آکر اپنی بھڑاس نکالتے اور براڈ کاسٹرز پر تنقید کرتے رہے ۔
کوہلی نے اسٹمپس مائیک کے پاس آکر کہا کہ ’’ڈی آر ایس میں یقینی طور پر جنوبی افریقا کے حق میں دھاندلی کی گئی ہے۔‘‘
کے ایل راہول نے کہا کہ ’’11 کھلاڑیوں کے خلاف پورا ملک ہے۔‘‘
اس پورے واقعے پر سوشل میڈیا پر بھی بحث چھڑ پڑی ، فینز کا کہنا ہے کہ انڈینز کو آج جس ڈی آر ایس کا دکھ ہے ، وہ 2011ء ورلڈ کپ میں اس ہی ڈی آر ایس سے مستفید ہوئی تھی جب سعید اجمل کی گیند پر ٹنڈولکر کا ایل بی ڈبلیو اوور ٹرن ہوگیا تھا۔
