مصباح لطیف(اے۔ای انڈرگرائونڈ نیوز)
چیئرمین فیڈرل بورڈ آف ریونیو (ایف بی آر) عاصم احمد کا کہنا ہے کہ ڈالر کے اتار چڑھاؤ میں ایک سے زیادہ عوامل شامل ہیں۔
پشاور میں تقریب سے خطاب کرتے ہوئے چیئرمین ایف بی آر کا کہنا تھا ایف بی آر نے معیشت کی بحالی کے لیے مختلف اقدامات کیے ہیں، ایف بی آر موجودہ دور کے تقاضوں سے مکمل طور پر آگاہ ہے۔
عاصم احمد کا کہنا تھا اس سال ورلڈ کسٹمز ڈے کا تھیم ٹیکس گیپ کو ختم کرنا ہے، ٹیکس گیپ کو ختم کرنے کیلئے اقدامات کر رہے ہیں، پہلا سال ہو گا جب ان ڈائریکٹ ٹیکس کے مقابلے میں ڈائریکٹ ٹیکس زیادہ اکٹھا ہو گا۔
امریکی ڈالر کی قیمت میں مسلسل اضافے کے حوالے سے چیئرمین ایف بی آر کا کہنا تھا ڈالر کے اتار چڑھاؤ میں ایک سے زیادہ عوامل شامل ہیں۔
انہوں نے مزید کہا کہ سرحدوں اور ائیر پورٹس پر ڈالرز کی اسمگلنگ کی روک تھام کے لیے فورس بڑھا دی ہے، ملک سے باہر ڈالرز ساتھ لے جانے کی حد بھی 10 ہزار سے کم کرکے 5 ہزار ڈالر کر دی ہے، وزیراعظم ہر ہفتے ڈالرز کی اسمگلنگ کے حوالے سے بریفنگ لیتے ہیں۔
چیئرمین ایف بی آر کا کہنا تھا نان فائلرز کی بینک ٹرانزیکشن پر ٹیکس لگانے سے متعلق ابھی کوئی فیصلہ نہیں ہوا اور بارڈز کو تجارت کے لیے 24 گھنٹے کھلا رکھنے کیلئے اقدامات کیے جا رہے ہیں۔
