(مصبا ح لطیف اے ای انڈرگرائونڈ نیوز)
بھارت میں احتجاجی خواتین ریسلرز نے وزیرکھیل انوراگ ٹھاکر سے ملاقات کے بعد مظاہرے ملتوی کرنے کا اعلان کر دیا۔
بھارتی میڈیا رپورٹس کے مطابق خواتین ریسلرز نے وزیرکھیل کے ساتھ 6 گھنٹے طویل ملاقات کی جس کے بعد احتجاج 15 جون تک ملتوی کرنے کا اعلان کیا گیا۔
خواتین ریسلرز کا کہنا ہے کہ نئی دہلی پولیس 28 مئی کو ریسلرز کےخلاف درج ایف آئی آر واپس لے گی، اگر حکومت نے مطالبات پورے نہیں کیے تو پھر سے مظاہرے پر غور کریں گے۔
وزیرکھیل انوراگ ٹھاکر کا کہنا ہے کہ ریسلنگ فیڈریشن آف انڈیا اور بی جے پی رکن پارلیمنٹ برج بھوشن سنگھ کے خلاف 15 جون تک تحقیقات پوری کر کے چارج شیٹ داخل کر دی جائے گی۔
ان کا کہنا تھا کہ 30 جون تک ریسلنگ فیڈریشن آف انڈیا کے انتخاب ہوں گے، ریسلنگ فیڈریشن کی ایک داخلی شکایت کمیٹی تشکیل کی جائے گی، جس کی صدارت ایک خاتون کرے گی۔
واضح رہے کہ بھارت کی ایلیٹ ریسلرز نے فیڈریشن کے چیف برج بھوشن شرن سنگھ کے خلاف جنسی ہراسانی کے الزامات لگائے تھے جس کے بعد خواتین ریسلرز نئی دہلی میں کئی ہفتوں سے احتجاج کر رہی تھیں۔
چند روز قبل نئی دہلی پولیس نے احتجاج کرنے والی خواتین پہلوانوں پر تشدد کیا تھا اور کئی پہلوانوں کو گرفتار بھی کیا تھا، پولیس 10 سے زائد پہلوانوں کے فیڈریشن چیف کے خلاف الزامات کے حوالے سے بیان ریکارڈ کر چکی ہے۔
