ہیڈ آف نیوز اسلام آباد منتظر مہدی
سپریم کورٹ نےسول ایوی ایشن کے جعلی ڈگری پر ملازمت مکمل کرنے والے جنرل منیجر سیکیورٹی کو پینشن جاری کرنے کا سندھ ہائی کورٹ کا حکم معطل کرنے کی محکمہ کی اپیل منظور کر لی ہے۔ سوموار کو عدالت عظمیٰ میں معامله کی سماگ چیف جسٹس کی سربراہی میں تین رکنی بینچ نے کی۔ دوران سماعت چیف جسٹس نے ریمارکس دئیے کہ سول ایوی ایشن انتہائی بد حال محکمہ ہے،جعلی ڈگریوں پر پائلٹ جہاز چلاتے رہے ہیں،جعلی ڈگری پر لوگ سیکورٹی جیسے حساس شعبے کی اہم ترین نشست پر نوکری پوری کر گئے،اسی لئے ائیر پورٹس پر سمگلنگ آسانی سے ہو رہی ہے،ائر پورٹس کے سی سی ٹی وی کیمرے تک کام نہیں کرتے۔اس موقع پر سول ایوی ایشن کے وکیل خالد صدیقی نے عدالت کو بتایا کہ جی ایم ندیم زبیری نے نہ صرف ڈگری جعلی جمع کروائی بلکہ کراچی یونیورسٹی کا تصدیقی لیٹر بھی جعلی بنوایا،سول ایوی ایشن کے وکیل نے عدالت سے استدعا کی کہ سندھ ہائی کورٹ کا فیصلہ حقائق کے منافی ہے اسے کالعدم کیا جائے۔عدالت عظمیٰ نے سول ایوی ایشن کی اپیل باقاعدہ سماعت کے لئے منظور کرتے ہوۓ سابق جی ایم سیکیورٹی سول ایوی ایشن ندیم زبیری کو پینشن دیے جانے کا ہائی کورٹ کا حکم بھی معطل قرار دے دیا ہے۔۔۔۔
